Salemite teka Seimat

Sai 1700 seilon ti amite toto xux Ninigo, amite kakak kakai Seimat. Ninigo i leili Manus provins ti Papua Niu Gini, 370 km sai tolai ahang ti texux xux Manus ma 250 km sai tola ti tehu taon Wewak. Amite Seimat totonai kilan xux kokol, kasinan texux xux Awin, Patexux, Mal, Lau, Pihon, Amix ma Liot. Tin hina teka Seimat totonai texux xux Luf, ti leili xux Hermit. Hina ti amite toto ma pupuas leili tehu taon Lorengau ti Manus ma taon liai masin Port Moresby, Lae, Wewak ma Madang.

Amite Seimat ti Ninigo, ati wawan ma hehin, amite seilon ti langalanga, teleiai xixi ma puasakei kin. Lilian ti kuewen, lawe amite hololi mamanu ma wa ti lang nunu, teleiai xixi ma ku hani xux texux texux. Xux ien kumahe pate lalap, aile ape kewi kinemite kumahe leili xux ti amite totonai. Amite ku tausi hani xux liai ti apuhiniai an he kin. Amite seseini hula, tapiok, api, panken, topiu, peteta ma kukamba. Tin hina huai pata masin man, maia, muli ma ul. Kilan wanen up xexex ti xux texux texux aile ape kewi amite uke ti hunaiai an. Tositos ti amite aniani se xixi, mom, pou ma kilan waliko ti itax.

Leili ahang 2013 tehu apuhain lalap ti amite amuke ukei Kakai Haeu ti kakai Seimat, puki kakaiamite wanen.